पुणे : प्रतिनिधी : रमेश निकाळजे
पुणे : महाराष्ट्राचे प्रभारी गोपाल इटालिया यांनी सुदर्शन जगदाळे यांची पुणे शहराध्यक्षपदी निवड केली असल्याचे जाहीर केले. जगदाळे हे आम आदमी पक्षाच्या स्थापनेपासून ते आजतागायत दिल्लीचे मुख्यमंत्री अरविंद केजरीवाल यांच्या विचारानुसार पक्षाचे काम करत आहेत.सुदर्शन जगदाळे हे उच्चशिक्षित असून त्यांचे शिक्षण बी ई इलेक्ट्रॉनिक झाले आहे. सध्या ते सॉफ्टवेअर इंजिनिअर आहेत.आणि ते खाजगी कंपनीमध्ये कार्यरत होते. त्यांनी पुणे शहरामध्ये आम आदमी पक्षाच्या वतीने घेण्यात आलेली आंदोलने तसेच पाणी प्रश्न याबाबत विशेष पुढाकार घेऊन मांडणी केली होती.
पुणे शहरातील आम आदमी पार्टी युवक तसेच महिला यांच्या पर्यंत पोहोचवण्यासाठी त्यांनी विशेष प्रयत्न करून पक्ष बांधणी केली. पुणे शहराच्या आम आदमी पार्टीच्या मीडिया सेलचे प्रमुख म्हणून देखील ते काम पाहत होते.
आगामी पुणे महानगरपालिकांच्या पार्श्वभूमीवर आम आदमी पार्टीने उच्चशिक्षित युवा नेतृत्वाच्या हातात अध्यक्षपदाची सूत्र सोपवली असून युवकांना मोठ्या प्रमाणात आकर्षित करण्याचा प्रयत्न पक्षाच्या वतीने केला जाणार असल्याचे दिसून येत आहे. तसेच पुणे शहरातील प्रश्न आक्रमक पद्धतीने मांडण्यासाठी युवकांची नवी फळी या निमित्ताने राजकारणात पाहायला मिळणार आहे.पुणे शहर अध्यक्ष पदी निवड झाल्याबद्दल जगदाळे यांच्यावर पुणे शहर आम आदमी पार्टी तसेच पुणे जिल्हा आम आदमी पार्टीच्या सर्व पदाधिकारी व कार्यकर्ते यांच्याकडून शुभेच्छांचा वर्षाव होत आहे.
