“पुण्यातील पोर्श गाडी अपघात प्रकरणाची गृहमंत्र्यांकडून दखल, देवेंद्र फडणवीसांकडून कठोर कारवाईचे दिले आदेश… पुण्यातील पोर्श गाडी अपघाताचा थरारक सीसीटीव्ही व्हिडीओ आला समोर…

१७ वर्षीय मुलाला न्यायालयाने काही अटींवर जामीन मंजूर केला. तसेच अपघातावर ३०० शब्दाचा निबंध लिहावा, असे आदेश दिले होते. यानंतर आता या अपघाताची दखल राज्याचे उपमुख्यमंत्री देवेंद्र फडणवीस यांनी घेतली आहे. तसेच या घटनेतील आरोपीवर कठोर कारवाईचे आदेश उपमुख्यमंत्री देवेंद्र फडणवीस यांनी दिले आहेत. या घटनेसंदर्भातील माहिती देवेंद्र फडणवीस यांनी पुणे पोलिस आयुक्तांना फोन करून घेतली, तसेच तात्काळ कारावाईचे आदेश दिले आहेत.

याबरोबरच या अपघातातील आरोपीला जामीन मिळाला असला तरी त्याविरुद्ध अपील दाखल करण्याच्या सूचना पुणे पोलिस आयुक्तांना उपमुख्यमंत्री देवेंद्र फडणवीस यांच्याकडून देण्यात आल्याची माहिती आहे. याबरोबरच या प्रकरणातील आरोपीला कोणती विशेष ट्रिटमेंट दिली असल्यास त्यावेळचे पोलीस ठाण्यातील सीसीटीव्ही फुटेज तपासून ते खरे असेल तर तात्काळ संबंधित अधिकाऱ्यावर निलंबनाची कारवाई करा, अशा सूचना उपमुख्यमंत्री फडणवीस यांनी दिल्या आहेत.

पोलिसांनी काय म्हटलं होतं? व्यावसायिकाचा मुलगा दारुच्या नशेत चालवत होता कार

सदर मुलगा हा पुण्यातील प्रतिष्ठित बांधकाम व्यावसायिकाचा मुलगा आहे. तो दारुच्या नशेत कार चालवत होता आणि त्याने दोघांना उडवलं ज्यात त्या दोघांचा मृत्यू झाला. त्याच्या रक्ताचे नमुने तपासणीसाठी पाठवण्यात आले आहेत. तसंच त्याला जामीनही मिळाला होता. पुणे शहर पोलिसांनी सांगितलं की, या प्रकरणातला आरोपी अल्पवयीन आहे. त्याच्याविरोधात सदोष मनुष्यवधाचा गुन्हा दाखल केला. त्याच्याविरोधात मोटार वाहन कायद्यातील ज्या कलमांचं उल्लंघन झालं ती कलमंही लावण्यात आली. या प्रकरणात अल्पवयीन मुलाचे वडील आणि ज्या बारने या मुलाला आणि त्याच्या मित्रांना मद्य दिलं त्यांच्याविरोधात कलम ७५ आणि ७७ अंतर्गत कारवाई केली जाईल. असंही त्यांनी स्पष्ट केलं होतं.